Cliciwch yma am Datblygiad Trem y Môr
Mae Cyngor Caerdydd yn datblygu cynlluniau cyffrous ar gyfer pont newydd i gerddwyr a beicwyr dros Afon Taf. Yn ddiweddar rydym wedi penodi tîm dylunio dan arweiniad Arcadis Consulting gyda Moxon’s Architects i ddechrau dylunio’r bont a byddem wrth ein boddau’n clywed eich barn.
Bydd y bont newydd yn cysylltu ystâd Trem y Môr, y Marl a’r ardal o amgylch Jim Driscoll Way ar lan orllewinol yr afon â Pharc Hamadryad ar y lan ddwyreiniol. Mae’r bont yn rhan bwysig o gynlluniau ehangach i adfywio ardal Trem y Môr. Byddwn yn darparu:
- Cysylltiad pwysig i gymunedau ar ddwy ochr yr afon, gan gysylltu ag ysgolion, parciau, cyfleusterau hamdden a
mannau agored. - Dolen bwysig o fewn y rhwydwaith ehangach o lwybrau ar gyfer cerdded a beicio, gan gysylltu â Llwybr y Bae a Llwybr Trelái.
- Dewis arall mawr ei angen yn lle’r A4232 Ffordd Gyswllt Bae Caerdydd, sy’n brysur iawn, a’r A4119 Heol Clarence ar gyfer cerddwyr a beicwyr, gan gynnwys plant ysgol.
Rydyn ni’n dylunio’r bont fel ei bod hi’n:
- Addas i gerddwyr a beicwyr
- Cyfleus i bobl o bob oedran a gallu
- Sensitif i’r amgylchedd lleol ac anghenion defnyddwyr yr afon
- Cynaliadwy yn ei dyluniad
- Ymarferol, o ran gwaith adeiladu a chynnal a chadw parhau
- Cael ei hintegreiddio i’r glannau, y parciau a’r rhwydwaith llwybrau ar y ddwy ochr.
Statws Presennol
Bydd y prosiect yn symud ymlaen yn y pedwar cam allweddol canlynol (gweler isod).
Cam 1 Gwaith Dylunio Cynnar
Mae’r cam hwn yn cynnwys cynnal yr holl waith arolygu angenrheidiol ar y safle, fel coed, ecoleg ac arolygon cyflwr safle. Dechreuodd hyn yn gynnar yn 2022 a bydd yn parhau tan wanwyn 2023. Mae’n dweud popeth sydd angen i ni wybod am y safle i helpu i ddylunio’r bont arfaethedig. Rydym hefyd wedi cynnal nifer o weithdai rhwng adrannau’r cyngor i drafod gofynion cynnar ar gyfer y dyluniad.
Defnyddiwyd y wybodaeth hon i gynnig rhai syniadau cychwynnol a dyluniadau cynnar ar gyfer y bont. Byddwn yn cael adborth ar y syniadau hyn gan y gymuned, rhanddeiliaid ac amrywiaeth o arbenigwyr technegol er mwyn gallu datblygu’r dyluniad ymhellach.
Cam 2 – Adolygu Adborth yr Ymgynghoriad a Datblygu Dyluniad Manwl
Mae’r cam hwn yn cynnwys adeiladu ar waith dylunio cam 1. Byddwn yn adolygu adborth o’r ymgynghoriad ac yn ymgynghori ag arbenigwyr technegol i siapio dyluniad y bont arfaethedig ymhellach.
Cam 3 – Ymgynghoriad Cyhoeddus Terfynol cyn cyflwyno cais cynllunio
Erbyn hyn bydd gennym ddyluniad manwl sy’n agos iawn at sut bydd y bont yn edrych, a byddwn yn ymgynghori â’r cyhoedd a rhanddeiliaid eraill unwaith eto i gael adborth. Byddwn yn adolygu’r adborth ymgynghori ac yn gwneud unrhyw newidiadau i’r dyluniad cyn iddo gael ei bennu ar gyfer y cais cynllunio.
Cam 4 – Cais Cynllunio:
Gobeithiwn allu cyflwyno cais cynllunio ar gyfer y datblygiad arfaethedig yng nghanol 2023, ar ôl i’r dyluniad manwl gael ei orffen.
Dweud eich dweud
Mae’r ymgynghoriad cyhoeddus ar y Bont Arfaethedig i Gerddwyr a Beicwyr o’r Marl i Barc Hamadryad bellach ar gau.
Diolch o galon i bawb a ddaeth i’n digwyddiadau ymgynghori ac a gyfrannodd eu sylwadau i’r ymgynghoriad.
Unwaith y byddwn wedi adolygu’r holl ymatebion, byddwn yn cyhoeddi canlyniadau’r ymgynghoriad cyhoeddus ar y dudalen hon.
Os oes gennych ragor o gwestiynau neu bryderon, mae croeso i chi gysylltu â ni.
Cysylltu â ni
Os oes gennych unrhyw gwestiynau neu bryderon am y prosiect hwn, cysylltwch â ni.